అభీష్టద బ్రహ్మస్తోత్రం

నమో హిరణ్యగర్భాయ బ్రహ్మణే బ్రహ్మరూపిణే |
అవిజ్ఞాత స్వరూపాయ కైవల్యాయామృతాయచ || 1 ||

యం న దేవా విజానంతి మనో యత్రాపి కుణ్ఠితం |
న యత్ర వాక్ప్రసరతి నమస్తస్మై చిదాత్మనే || 2 ||

యోగినో యం హృదాకాశే ప్రణిధానేన నిశ్చలాః |
జ్యోతిరూపం ప్రపశ్యంతి తస్మై శ్రీ బ్రహ్మణే నమః || 3 ||

కాలాత్ పరాయ కాలాయ స్వేఛ్ఛయా పురుషాయ చ |
గుణత్రయ స్వరూపాయ నమః ప్రకృతిరూపిణే || 4 ||

విష్ణవే సత్త్వరూపాయ రజోరూపాయ వేధసే |
తమసే రుద్రరూపాయ స్థితిసర్గాంతకారిణే || 5 ||

నమో బుధ్ధిస్వరూపాయ త్రిధాహంకృతయే నమః |
పఙ్చతన్మాత్రరూపాయ పఙ్చకర్మేంద్రియాత్మనే || 6 ||

నమో మనః స్వరూపాయ పఙ్చబుధ్ధీంద్రియాత్మనే |
క్షిత్యాది పఙ్చరూపాయ నమస్తే విషయాత్మనే || 7 ||

నమో బ్రహ్మాండరూపాయ తదంతర్వర్తినే నమః |
అర్వాచీన పరాచీన విశ్వరూపాయ తే నమః || 8 ||

అనిత్యనిత్యరూపాయ సదసత్పతయే నమః |
సమస్తభక్తకృపయా స్వేఛ్ఛావిష్కృతవిగ్రహ || 9 ||

తవ నిశ్వసితం దేవాః తవ స్వేదోఖిలం జగత్ |
విశ్వా భూతాని తే పాదః శీర్ష్ణో ద్యౌస్సమవర్తత || 10 ||

నాభ్యా ఆసీదంతరిక్షం లోమాని చ వనస్పతిః |
చంద్రమా మనసో జాతః చక్షోస్సూర్యస్తవ ప్రభో || 11 ||

త్వమేవ సర్వం త్వయి దేవ సర్వం 
స్తోతాస్తుతిస్తవ్య ఇహ త్వమేవ |
ఈశా త్వయా వాస్యమిదం హి సర్వం 
నమోస్తు భూయోపి నమో నమస్తే || 12 ||

ఇతి స్తుత్వా విధిం దేవాః నిపేతుర్దండవత్ క్షితౌ  |
పరితుష్టస్తదా బ్రహ్మా ప్రత్యువాచ దివౌకసః || 13 ||

బ్రహ్మోవాచ :

యథార్థాzనయా స్తుత్యా తుష్టోస్మి ప్రణతాస్సురాః |
ఉత్తిష్ఠత ప్రసన్నోస్మి వృణుధ్వం వరముత్తమం || 14 ||

యస్తోష్యత్యనయా స్తుత్యా శ్రధ్ధావాన్ ప్రత్యహం శుచిః |
మాం వా హరం వా విష్ణుం వా తస్య తుష్టాః సదా వయం || 15 ||

దాస్యామః సకలాన్ కామాన్ పుత్రాన్ పౌత్రాన్ పశూన్ వసు |
సౌభాగ్యమాయురారోగ్యం నిర్భయత్వం రణే జయం || 16 ||

ఐహికాముష్మికాన్ భోగాన్ అపవర్గం తథాzక్షయం |
యద్యదిష్టతమం తస్య తత్తత్సర్వం భవిష్యతి || 17 ||

తస్మాత్సర్వ ప్రయత్నేన పఠితవ్యః స్తవోత్తమః |
అభీష్టద ఇతి ఖ్యాతః స్తవోయం సర్వ సిధ్ధిదః || 18 || 

ఇతి స్కాందపురాణ-కాశీఖండాంతర్గతం అభీష్టద బ్రహ్మస్తోత్రం ||